(नगरदेवळा ) विशेष/प्रतिनिधी):-
(नगरदेवळा दर्पण मराठी लाईव्ह न्युज):-
लाडशाखीय वाणी समाज, नगरदेवळा यांच्यावतीने आयोजित ‘माहेरवाशीण मेळावा २०२६’ हा सोहळा नुकताच अतिशय उत्साहात आणि मंगलमय वातावरणात पार पडला. माहेरवाशिणींसाठी खास आयोजित या कार्यक्रमामुळे नगरदेवळा नगरी आनंदात न्हाऊन निघाली होती. आपल्या माहेरी परतलेल्या लेकींचा उत्साह आणि त्यानिमित्ताने जमलेला समाजाचा परिवार यामुळे हा मेळावा अविस्मरणीय ठरला.
पारंपरिक मिरवणुकीने वाढवली शोभा
कार्यक्रमाची सुरुवात सकाळी ७:०० वाजता नाश्त्याने झाली. त्यानंतर सकाळी ८:०० वाजता काढण्यात आलेल्या पारंपरिक मिरवणुकीने वातावरणात चैतन्य भरले. ढोल-ताशांच्या गजरात आणि लेकींच्या उपस्थितीने परिसर दुमदुमून गेला होता. पारंपारिक वेशभूषेतील माहेरवाशिणींचे स्वागत करताना समाजबांधवांचा उत्साह ओसंडून वाहत होता.
औक्षण आणि भावनिक स्वागत
सरदार एस. के. पवार हायस्कूल येथे आयोजित या सोहळ्याचे प्रास्ताविक छाया शरद शिरुडे (छाया काकू) यांनी केले. त्यानंतर उपस्थित सर्व माहेरवाशिणींचे औक्षण करून आणि पुष्पवृष्टी करत त्यांचे जंगी स्वागत करण्यात आले. हे दृश्य खऱ्या अर्थाने समाजाच्या एकतेचे आणि मायेचे दर्शन घडवणारे होते.
गुणदर्शन आणि मनोरंजनाची मेजवानी
कार्यक्रमाच्या पुढील सत्रात ‘परिचय सत्र’ पार पडले, ज्यामध्ये लेकींनी आपल्या आठवणी आणि अनुभव व्यक्त केले. त्यानंतर रंगलेल्या गुणदर्शन व नृत्य सादरीकरणाने उपस्थितांची मने जिंकली. विविध मनोरंजनात्मक खेळ आणि उपक्रमांमुळे वातावरणात हास्याचे कारंजे उडाले होते. या कार्यक्रमाच्या माध्यमातून जुन्या ओळखींना नवी उजाळा मिळाली.
स्नेहभोजन आणि कृतज्ञतेचा सोहळा
दिवसभराच्या विविध कार्यक्रमांनंतर सर्वांनी स्नेहभोजनाचा आस्वाद घेतला. त्यानंतर उपस्थित माहेरवाशिणींना ओटी व खाऊ वाटप करून कृतज्ञता व्यक्त करण्यात आली. “माहेरवाशिणींचा हा मेळावा म्हणजे नात्यांची ऊब आणि आनंदाचा अविस्मरणीय उत्सव,” अशा भावना यावेळी उपस्थितांनी व्यक्त केल्या.
या यशस्वी आयोजनाबद्दल लाडशाखीय वाणी समाज, नगरदेवळा यांच्या सर्व कार्यकर्त्यांचे सर्वत्र कौतुक होत आहे. अशा प्रकारच्या उपक्रमांमुळे समाजात एकोपा आणि संस्कृतीचे जतन होत असल्याचे मत मान्यवरांनी व्यक्त केले.
खूप छान कार्यक्रम पार पडला, आयोजकांचे मनःपूर्वक अभिनंदन!
नगरदेवळा दर्पण मराठी Live न्यूज 