नगरदेवळा येथे सोमवारच्या आठवडे बाजारात प्रचंड वाहतूक कोंडी; नागरिक अन् वाहनधारक त्रस्त!

नगरदेवळा (विशेष प्रतिनिधी):-

(नगरदेवळा दर्पण मराठी लाईव्ह न्युज) :-

आज बाजाराच्या दिवशी मुख्य रस्त्यावरच भाजीपाला विक्रेते, फळविक्रेते आणि इतर व्यावसायिकांनी दुकाने थाटल्याने रस्ता अरुंद झाला होता. त्यातच बाजारात येणाऱ्या नागरिकांनी आपली दुचाकी व चारचाकी वाहने रस्त्याच्या कडेला अस्ताव्यस्त पार्क केल्यामुळे वाहतुकीचा पार बोजवारा उडाला.तासनतास रखडली वाहतूकवाहनांच्या लांबच लांब रांगा लागल्यामुळे पादचाऱ्यांना चालणेही कठीण झाले होते. कडक उन्हात लहान मुले आणि वृद्धांचे प्रचंड हाल झाले. काही वेळ तर रुग्णवाहिका आणि अत्यावश्यक सेवेतील वाहनेही या कोंडीत अडकून पडली होती.

दर आठवड्याला बाजाराच्या दिवशी हीच परिस्थिती निर्माण होत असल्याने स्थानिक नागरिकांमधून तीव्र संताप व्यक्त होत आहे.

ग्रामपंचायत आणि प्रशासनाने लक्ष देण्याची मागणीदर सोमवारी होणाऱ्या या त्रासातून कायमची सुटका करण्यासाठी ग्रामपंचायत प्रशासन आणि स्थानिक पोलिसांनी बाजाराच्या दिवशी वाहतूक नियोजनासाठी चोख व्यवस्था करावी, तसेच रस्त्यावरील तात्पुरती लावलेले गाड्या हटवून वाहन पार्किंगसाठी स्वतंत्र जागा उपलब्ध करून द्यावी, अशी जोरदार मागणी नगरदेवळा परिसरातील ग्रामस्थांनी केली आहे.

विशेष म्हणजे, या आठवडे बाजारात होणारी गर्दी आणि वाहतूक सुरळीत ठेवण्यासाठी स्थानिक पोलीस प्रशासनाचे नेहमीच पूर्ण सहकार्य लाभते. पोलिसांकडून वाहतूक नियंत्रणात आणण्यासाठी शर्थीचे प्रयत्न केले जातात. मात्र, बाजारातील वाढती गर्दी आणि अस्ताव्यस्त पार्किंगमुळे या समस्येवर कायमस्वरूपी तोडगा काढण्याची मागणी आता नागरिकांमधून केली जात आहे