पाचोरा (विशेष/प्रतिनिधी):–
नगरदेवळा दर्पण मराठी लाईव्ह न्युज:-
जळगाव स्थानिक स्वराज्य संस्था विधानपरिषद निवडणुकीच्या पार्श्वभूमीवर राजकीय घडामोडींना वेग आला आहे. या महत्त्वाच्या निवडणुकीसाठी अधिकृत उमेदवारी जाहीर झाल्यानंतर उमेदवार नंदकिशोर महाजन यांनी पाचोरा येथे शिवसेनेचे ज्येष्ठ नेते आणि स्थानिक आमदार मा. श्री. किशोरआप्पा पाटील यांची सदिच्छा भेट घेतली. या भेटीदरम्यान आमदार किशोरआप्पा पाटील यांनी उमेदवाराचे अभिनंदन करून आगामी वाटचालीस सदिच्छा दिल्या.
मान्यवरांची उपस्थिती आणि पाठिंबा
या महत्त्वपूर्ण प्रसंगी महायुतीतील सर्वच घटक पक्षांमधील दिग्गज नेते उपस्थित होते. यामध्ये खासदार श्रीमती स्मिताताई वाघ, आमदार श्री. राजुमामा भोळे, जळगाव पूर्व विभाग भाजप जिल्हाध्यक्ष श्री. चंद्रकांत बाविस्कर, शिवसेना जळगाव जिल्हाप्रमुख व माजी जिल्हा परिषद सदस्य श्री. रावसाहेब मनोहर पाटील, तसेच श्री. जितेंद्र पाटील, श्री. मधुकर काटे आणि श्री. सुमित पाटील यांसारख्या प्रमुख मान्यवरांचा समावेश होता. याशिवाय शिवसेनेचे सर्व नगरसेवकही यावेळी उपस्थित राहून त्यांनी आपला सक्रिय पाठिंबा दर्शविला.
“जनतेची सेवा करण्याचा संकल्प दृढ”
सर्व मान्यवरांकडून मिळालेल्या शुभेच्छा, पाठिंबा आणि त्यांच्यावरील विश्वासाने आगामी निवडणुकीत अधिक जोमाने आणि आत्मविश्वासाने कार्य करण्याची मोठी प्रेरणा मिळाल्याची भावना उमेदवाराने व्यक्त केली आहे. महायुतीतील सर्व नेत्यांच्या उपस्थितीने जळगाव विधानपरिषद निवडणुकीच्या रिंगणात महायुतीची ताकद अधिकच वाढली असल्याचे स्पष्ट होत आहे.
कार्यकर्त्यांमध्ये उत्साहाचे वातावरण
पाचोरा येथील या भेटीगाठीमुळे कार्यकर्त्यांमध्ये उत्साहाचे वातावरण असून, आगामी निवडणूक महायुती एकदिलाने लढणार असल्याचे या निमित्ताने पुन्हा एकदा अधोरेखित झाले आहे. आगामी काळात ही साथ आणि विश्वास जपत विकासाचा अजेंडा जनतेपर्यंत पोहोचवला जाईल, असा विश्वास यावेळी व्यक्त करण्यात आला.
नगरदेवळा दर्पण मराठी Live न्यूज 